移居到澳門之後，因為交通需要，一直都想學下電單車。適逢澳門政府嘅持續進修基金可以攞嚟學車，所以舊年年尾膽粗粗報咗650電單車考試，諗住可以免費學車（入稟費唔包），點知對我依D完全無經驗嘅人來講，原來係惡夢嘅開始。

因為前前後後用咗50多個鐘，去咗三十幾日，才夠膽考試，仲要係喺考試之前一星期才成功打到第一次斜路雪糕筒(八字)，嗰種緊張同埋焦慮而家諗返都歷歷在目。亦因為我學咗咁多個鐘，所以累積咗好多心得，希望透過呢個平台可以幫到大家學習並成功過關。

為什麼要考650？

係澳門，考到650，就可以揸晒任何種類嘅自動波及棍波電單車，所以一定係最好的牌照。其實計返條數，你考兩次牌，即一次250，一次650，其實一樣要花最少35小時（一次25，一次15），所以不如好似我咁一次過搞掂佢。當然你諗住唔會揸400 CC以上嘅車，就另當別論，但人生充滿變數，真係講唔埋。

駕駛學校名單/地址/電話

650(有檔) vs 250(有檔) vs 150(有檔)

幾架我都揸過，我可以老實同你講，各有各嘅好處同埋難度。知道竅門之後，反而我而家覺得揸大車比較容易控制。
學習車型(大偉汽車駕駛學)
學習車型(中華汽車駕駛學)
銘威駕駛學校
 安格汽車

考試流程

斜路雪糕筒 + 路試

駕駛考試排期

學習心得

平衡

其實點解電單車兩個碌都可以行得到？係咪因為平衡力？

唔係，係因為架車有動力。你試吓架車唔郁，唔落腳架，你坐喺上邊，佢會唔會跌？

因為我是初學，最初嗰幾堂，師傅係會鎖死個油門，唔比我俾太多油，一嚟係驚我控制唔到，二來係想訓練低速平衡力。呢幾堂好重要，建議大家唔好心急，係試場出面認真學習。

剎車同起步

未入試場之前，最好練多啲後制剎車同埋起步。我自己因為太過心急入考場，所以入到去師傅話我根基唔好，又要要再練習剎車同起步浪費了很多時間及印花。

鬍鬚佬開講之制動篇

離合器

俗稱極力子，係棍波車嘅精髓。搞唔掂個極力子，唔使旨意打到斜雪糕筒。我建議試多啲唔好放晒極力子轉彎及打八字（650)，習慣一下左手捉住個極力子去轉彎。我自己揸125同250時，因為習慣放哂極力子打平八及平地雪糕（覺得速度適中），去到650時發現依個方法控制唔到車速，比少少油成架車飛左去，師傅發現之後，同我講：「放晒極力子死緊㗎喎，你唔知㗎？」我心諗：「梗係唔知啦！XX」。就係呢個原因我之後要花幾個小時重新適應半極力子呢個操控方法。

鬍鬚佬開講之離合器篇|
Never again fear dropping your motorcycle (極力子!!!!!!)

平地八字

喺市場出面個細停車場，練習到足夠嘅操控技巧，師傅就會叫你入去試場。做一輪熱身之後，師傅就會叫你去打平八。125同250應該冇乜難度。個人認為最重要係練習到，減速轉完彎之後到中間個「X」位，感覺到架車就來跌（因為轉完彎個動力用晒），你會本能地加少少油去攞返直架車既話，就證明你已經掌握到打八子嘅感覺，你就可以進入下一階段，「平地雪糕筒」。

平地雪糕筒

我可以老實咁講，平地及斜路雪糕筒嘅操作方法係兩樣野。我真係唔建議大家花太多時間係平路。你只要成功打到幾次而又唔撞跌雪糕筒，我覺得己經可以上斜。唔使聽嗰啲師傅講話要打好「平雪」先上，根本打到識飛都冇用。
Motorcycle Slow Speed Maneuvering | Low Speed Motorcycle Control | TEAM Arizona Part 2

斜路雪糕筒

很多人都說打到斜路雪糕筒，基本上八成攞到牌。我個人認為係90%以上，因為路試真係比想像中易好多。以下就係關於「斜雪」嘅學習心得：

1. 不要麻木聽從師傅嘅說話

每個人都有唔同嘅方法及姿勢，唔會個個都一樣，所以只要你打到就得㗎啦，冇人會理你姿態靚唔靚。好似我咁，師傅成日話我斜身，好易跌車，最後自己發現，其實好多人都係咁，但一樣打到，只要你掌握到你自己最舒服嘅姿勢其實就OK。

2. 分階段練習

我個師傅只係同我講，可以上高D及落低D先轉彎，初學時不要太介意出白及黃界。我覺得出發點係啱嘅，亦係第一步，但佢亦只係停留喺依一種方法。好似覺得只要唔介意出界，就可以一次過輕輕鬆鬆完成晒整個動作。我亦因為咁，搞到好緊張，完全唔知自己喺度做緊乜。所以我自己建立左以下嘅學習方法希望大家都一齊試吓:

a) 斜坡停車/起步

如果大家從來未試過喺斜路停車，就要好好練習這一個最基本嘅動作。方法就係當就嚟去到白色格仔嘅時候，收油，慢慢踩腳制，慢慢收極力子。當架車停咗喺度，唔好放腳制住，感受一下依個狀態。

當起步嘅時候，大家最驚嘅，當然就係溜後。

其實只要架車入咗一波，唔握實極力子，架車都唔會溜後，所以唔使驚。就算起唔到步，千祈唔好緊張，即刻放返開個離合，有得佢死火，架車都應該唔會郁。

起步嘅動作係，俾少少油，慢慢放離合到磨擦點，俾多少少油，感覺到架車開始郁，你就可以慢慢放腳掣。講就好容易，我自己都練咗好多次先成功。

【檔車教學】4分鐘學會檔車的上坡起步與駐車
 [檔車教學] 上坡起步 How To Start On Uphill

b) 落斜

上到斜路上方，唔使急於轉彎，斜路上面係平地，喺平地先慢慢轉彎落斜，落斜記得踩後煞。因為後煞唔會立即鎖死部車，只要你唔好一腳踩實，架車就慢慢溜落嚟。

唔熟上斜落斜，就先練習以上動作，即係每次只係練習上斜，停車，及落斜，等掌握到及有信心先至再跳下一步。

c) 底部轉彎

底部轉彎係最難嘅操作技巧，因為同一時間又要落腳煞，又要轉彎，轉完彎又要比油上，係咁短時間要控制咁多嘢，所以初時係好難掌握。我認為最重要係掌握放腳煞嘅時間，根據我自己嘅慣常落斜速度，腳煞最好係落到個彎底部先放。呢個動作你係平路八字及平路雪糕筒都唔會遇到，所以係最難最難嘅部份。放左腳掣其實架車仲有動力向前，這時候就要繼續轉右上斜。

d) 上斜比油

呢個部份呢我上網都睇過好多資料，有啲人呢就話定油，有啲人就係一下一下咁比，即係收下比下。我覺得如果唔使轉彎只係直上，就可以定油，如果要轉彎，我比較喜歡一下一下咁比。記住記住一定要半離合，如果唔係，你一比油，架車就飛咗去。
點樣打8字? 全方位版本 (可以定油因為架車馬力細…..)
Never again fear dropping your motorcycle (1000cc!!!! 留意5:59)

我建議大家唔熟嘅時候，就唔好諗住轉雪糕筒，只係做上斜+落斜+轉彎嘅動作先。

當掌握到兜大圈嘅動作，就可以嘗試一下轉一個雪糕筒。

d) 頂部轉落

轉完第一個雪糕筒，上到頂部就可以左轉落返嚟，依度亦都要小心，好多人因為驚出界，所以唔敢俾太多油，但俾唔夠油，架車冇動力，失平衡，你就會落腳。我嘅建議係，半離合，轉”左”彎之前俾多少少油，等架車有力上斜同埋轉彎，當架車就嚟出界，就印少少腳制，印下印下，唔好大力唔好踩死。當架車轉返落去好似想撞埋水馬嘅時候，又係一樣印少少腳制，減慢車速，咁樣會比較容易控制到。

當你掌握到以上嘅基本技巧，就可以練習考試要求嘅斜路雪糕筒。

【電單車新8字】5月起電單車考牌啟用新“8字” 你掂嗎? 隨片附送“新8字升呢寶典”

先講第一部份，主要就係上斜，停架車係白色格仔，再作斜路起步，喺頂部轉右彎，垂直落斜(後煞)，轉右，接近底部放腳煞，上斜 (半離合，一下一下油咁上)，兜兩個雪糕筒上頂部，向左轉。